ඌව වෙල්ලස්ස විශ්වවිද්‍යාලය තුළ ක්‍රියාත්මක වන, තිරසාර සංවර්ධන වැඩසටහනක් ලෙස "කොරටුව" ව්‍යාපෘතිය හඳුන්වා දිය හැකිය.මෙය ඌව වෙල්ලස්ස විශ්වවිද්‍යාලයීය රොටරැක්ට් සමාජය විසින් ක්‍රියාත්මක කෙරෙන, පරිසර හිතකාමී වැඩසටහනක් ලෙස ආරම්භ විය.වර්තමාන ලෝකය පරිසර දූෂණය, සම්පත් හිඟය සහ අපද්‍රව්‍ය කළමනාකරණය වැනි බරපතල ගැටලු රැසකට මුහුණ දී සිටින බැවින්, ඒවාට ප්‍රායෝගික සහ තිරසාර විසඳුම් සොයා ගැනීම අත්‍යවශ්‍ය වී ඇත. මෙම අවශ්‍යතාවයට පිලියමක් ලෙස "කොරටුව" ව්‍යාපෘතිය නිර්මාණය විය.

විශ්වවිද්‍යාල පරිසරය තුළ දෛනිකව නේවාසිකාගාර, ආපනශාලා සහ විවිධ ක්‍රියාකාරකම් මඟින් විශාල ප්‍රමාණයක කාබනික අපද්‍රව්‍ය ජනනය වේ.සාම්ප්‍රදායිකව මෙම අපද්‍රව්‍ය ඉවත් කළ යුතු වුවද, මෙම ව්‍යාපෘතිය තුළින් එම අපද්‍රව්‍ය ක්‍රමවත් ලෙස බැහැර වේ.

මෙම ව්‍යාපෘතිය “චක්‍රීය ආර්ථිකය” (Circular Economy) මූලධර්මය මත පදනම් වී ඇත.එහිදී කිසිදු ද්‍රව්‍යයක් අපතේ නොයන අතර එක් ක්‍රියාවලියක ප්‍රතිඵලය තවත් ක්‍රියාවලියකට මූලාරම්භයක් වනු ඇත.මේ ආකාරයෙන් සම්පූර්ණ පද්ධතියක් ලෙස ක්‍රියාත්මක වන ඒකාබද්ධ ආකෘතියක් මෙහි ගොඩනගා ඇත.

මෙම ආකෘතිය තුළ බිම්මල් වගාව, කොම්පෝස්ට් නිෂ්පාදනය, ජීව වායු නිෂ්පාදනය සහ එළවළු වගාව යන ප්‍රධාන ක්‍රමවේද හතරක් අන්තර්ගත වේ. සෑම අදියරක්ම එකිනෙක සමඟ සම්බන්ධව ක්‍රියා කරමින් පද්ධතියේ චක්‍රීය ගමන් මඟ ශක්තිමත් කරයි.

පාරිසරික වාසි වලට අමතරව, මෙම ව්‍යාපෘතිය අධ්‍යාපනික සහ නවෝත්පාදන වේදිකාවක් ලෙසද ක්‍රියා කරයි. සිසුන්ට තිරසාර කෘෂිකර්මය, පුනර්ජනනීය ශක්ති පද්ධති සහ අපද්‍රව්‍ය කළමනාකරණය පිළිබඳ ප්‍රායෝගික අත්දැකීම් ලබා දීම මෙහි ප්‍රධාන අරමුණු වී ඇත.එමඟින් නායකත්වය, කණ්ඩායම් වැඩ සහ ගැටලු විසඳීමේ හැකියාවද වර්ධනය වේ.

අවසානයේ, "කොරටුව" ව්‍යාපෘතිය හුදෙක් පරිසර ක්‍රියාදාමයක් පමණක් නොව චින්තන පරිවර්තනයකි.එය හරිත දැක්මක ආරම්භය සනිටුහන් කරයි.